Më 02. 07 – 09. 07. 2022 u zhvillua në Krems të Austrisë Java e Librit Elektronik, Eljub-E-Book, projekt i cili këtë vit festoi 10-vjetorin e tij. Shkolla jonë u përfaqësua nga Sindi Isufi, Ana Çobaj, Viktor Bazhdari, Braian Plaku me mësuesen Mikela Lekaj, të cilët kaluan në Krems një javë ndëraktive dhe të paharrueshme.
Gjatë kësaj jave nxënësit tanë së bashku me të rinjtë nga 12 shtete të tjera shkruan tekste mbi tri tema kryesore: ‘‘Të kujdesesh për shëndetin‘‘, “ Mall për paqen dhe sigurinë“, “Të jesh i ri nuk është e lehtë“.
Tekstet janë shkruar individualisht ose në grup. Këtë vit Libri Elektronik Eljub E-Book përfshin 211 faqe dhe mund ta gjeni edhe në faqen e internetit: https://www.eljub.eu/De/eText/587/Sehnsucht_nach_Frieden.
Përveç grupit të teksteve, gjatë javës u realizua edhe një film me minutazh të shkurtër me një nga temat e Eljub E-Book të vitit të kaluar. Në grupin e filmit mori pjesë nxënësi Braian Plaku.
Java ishte tepër ndëraktive dhe me program të pasur kulturor. Në program ishin të planifikuara prezantimet e shteteve pjesëmarrëse, ku nxënësit dhe nxënëset tona u paraqitën me një video shumë mbresëlënëse duke e shoqëruar atë me vallen tradicionale shqiptare.
Në ditën e kulinarisë, grupi ynë prezantoi pjatën tradicionale shqiptare “Jahni me mish“. Atë ditë kishim mundësi të provonim gatime të ndryshme të vendeve të tjera.
Pika të tjera të rëndësishme të aktivitetit kulturor ishte edhe vizita në hidrocentralin teknik Theiß, duke vijuar me kërcime dhe festime. Java u mbyll me një shëtitje në anije mbi Danub, nga Krems në Spitz, ku edhe u zhvillua darka përmbyllëse e javës, u prezantua libri elektronik edhe filmi i shkurtër.
Për ne të gjithë ishte një javë e paharrueshme.

Mikela Lekaj